Thursday, March 16, 2006
اغنيه عيالى
كان فيه زمان اغنيه عيالى بحبها اوي..مافيهاش فن ولا احساس ولا..ولا..لكن جميله.تفكرك بطفل صغير عينيه واسعه ماسك تفاحه بيعضعض فيها.كلماتها بتبدأ:"الواحد واقف مظبوط و الاتنين بتبص عليه ...."
الواحد واقف مظبوط
مش اى حد ياخد رقم واحد، اصل رقم واحد برغم انه بسيط ضله كبير اوى ،واخد تحته حاجات كتير و حتت كتير فعشان يكون رقم واحد-واحد صحيح لازم يعرف يكسب ضله.
مش بس كده، رقم واحد كمان لازم يصلب طوله و يفضل صالب طوله اصله لو فكر حتى يميل سنه يتقلب اتنين و لو مدد مش هيتعرف من الارض-يعنى لو عايز الواحد يسبق واحد صحيح لازم يصمم يصلب طوله.
ناقص حاجه: رقم واحد مش لازمله عيائه يعنى لا طاقيه ولا كرافته هو حلو كده ذى ما هو.لو جرب يلبس طاقيه هيدخلنا فى متاهة الحروف ولو حط كرافته يبقى الواحد الخواجاتى ابو زلومه-لو عايز يا واحد تكون واحد اوى يبقى بلاش عيائه.
خد بالك يا واحد ما هو أصل اللعبه مش كلها عليك.ما تنساش انك اول الارقام و ابوهم, اول السطر و اهم ما فيه.صيتك عالى و صوتك واصل و كلمتك مسموعه و الكل متبعيك.كل ده كده بالساهل؟!
la brize
كان فيه زمان اغنيه عيالى بحبها اوي..مافيهاش فن ولا احساس ولا..ولا..لكن جميله.تفكرك بطفل صغير عينيه واسعه ماسك تفاحه بيعضعض فيها.كلماتها بتبدأ:"الواحد واقف مظبوط و الاتنين بتبص عليه ...."
الواحد واقف مظبوط
مش اى حد ياخد رقم واحد، اصل رقم واحد برغم انه بسيط ضله كبير اوى ،واخد تحته حاجات كتير و حتت كتير فعشان يكون رقم واحد-واحد صحيح لازم يعرف يكسب ضله.
مش بس كده، رقم واحد كمان لازم يصلب طوله و يفضل صالب طوله اصله لو فكر حتى يميل سنه يتقلب اتنين و لو مدد مش هيتعرف من الارض-يعنى لو عايز الواحد يسبق واحد صحيح لازم يصمم يصلب طوله.
ناقص حاجه: رقم واحد مش لازمله عيائه يعنى لا طاقيه ولا كرافته هو حلو كده ذى ما هو.لو جرب يلبس طاقيه هيدخلنا فى متاهة الحروف ولو حط كرافته يبقى الواحد الخواجاتى ابو زلومه-لو عايز يا واحد تكون واحد اوى يبقى بلاش عيائه.
خد بالك يا واحد ما هو أصل اللعبه مش كلها عليك.ما تنساش انك اول الارقام و ابوهم, اول السطر و اهم ما فيه.صيتك عالى و صوتك واصل و كلمتك مسموعه و الكل متبعيك.كل ده كده بالساهل؟!
la brize
Monday, January 23, 2006
بقية الطبق
تفتكروا طعم السما ايه؟ يعنى لو اخدت حته من السما و عملتها كوره ممكن تبقى ازاى من جوه؟
اكيد ناعمه، و اكيد حلوه، و اكيد و انت بتقطم منها مش هتسيب تعاريج.صح ..بالظبط ذى خوخه مدوره و ناعمه و حلوه و من غير تعاريج.
ممكن تكون ما دقتش السما ،لكن دقت الرمان؟ طب عمرك دقت حاجه خليتك تتمنى ان كل الناس تدوقها؟ حاجه تسيب بين شفايفك طعم يخلى مهما الجوع يقرصك ما ترضاش تلخبط طعمها بطعم اى حاجه تانيه؟
يا جماعه هى دى رمانه او بمعنى اصح فرط الرمان .
كنت دايما لما بشوف فرط الرمان باحس انه خساره فى الاكل. اصله بجد اجمل من انه يتاكل و خلاص و كنت باحس انه اقرب للجواهر منه للفاكهه.الله مثلا على عقد فرط الرمان!! لكن لما كنت باحاول اعمل منه عقد كان بيبقى اضعف من انه يستحمل ثوانى و يرجع تانى فرط رمان.
*فى الشتا قدام البحر و انت بتتنفس هوا اسكندريه الساقع ،لابس 50 حاجه فوق بعض و مفيش غير وشك و كفوفك بس هما اللى بيستقبلوا الهوا.تحس فجأه ان كل احساس فيك ممكن تعبر عنه نسمة هوا بارد تلمس وشك او كفوفك.
اهو انا بقه كل ما ادوق الرمان احس بكده! احس ان حبات فرط الرمان يقدروا يعبروا عن كل احساس فيا .
احس بالحريه من تدافعهم وقت الخروج من الثمره ،و بالجمال من روعة درجات الوان الحبه القرمزى الشفاف ،و بالرقه من دوبان الحبات فى حضن شفايفى ،و بالشقاوه من ضحكات رذاذ عصيرهم جوايا و برغم ده كله لو شفتهم و هما جوا الثمره تحس انهم بيندهولك بروح شاربه من الشقا و كأن الشجره متشاله على كتافهم مش هما اللى متشعلقين فيها.
فرط الرمان بقى من غير ما تعرف اسمها تحتار تقول عليها ايه: ريشه حمامه وقعت من جناح مكسور و دواها الهوا ،ولا كام نقطة ملونه وقعوا من ريشة طفل صغير فوق باليته و لما اتجمعوا عملوا لوحه جميله و محندقه
يمكن كمان تقول عليها اوضه و ليها الف باب منهم بابين متغطيين بقماشه سوده و مسنكرين باقفال نحاس و ان شفتهم يمكن تخاف او تفتكرانهم بينادوك علشان تشيل لون الزمان ولو قربت منهم هتلاقى نفخه واحده منك تبين جنه اجمل شجره فيها شجرة الرمان
ممكن كمان توصفها بانها ممكن تلخص الحياه كل الحياه فى اٌهه دايبه و دمعتين و ساعات تقولها بشعره طايره و ضحكه بتخلى الهوا حتى الهوا يدوب حنين
عارف ازاى ممكن تكون مبهور لو انك بتشوف لأول مره ثمرة رمان و لقيت قشرتها بتتفتح و كل حبه بتخلع شالها و تنزل عشان تستقبلك.
تخيل بقه لو قلبك هو اللى كان تحت القشره و خلع شاله و حب يستقبل الحياه.اهى دى بالظبط فرط الرمان:قلبى و قلب خوخه و كل اللى فى الطبق خالعين شيلانهم و بكل ذره فى كيانهم بيستقبلوا الحياه.بالرغم من انهم شايفين سكاكين الحياه و ياما داقوا طعمها و يمكن كمان من مرها افتكروا طعم الحلو راح الا انهم لسه بيعاندوا الحياه.
وكأنهم مقررين يا يدوبوا يا تدوب الحياه.
ناقص حاجه...
فرط الرمان بقه اصعب ما فيها انها سهل اوى تجرى من بين صوابعى و تهرب و تستخبى
هاعمل ايه؟ ما هى لازم تفضل فرط الرمان...
مازلنا فى الطبق
La brize
تفتكروا طعم السما ايه؟ يعنى لو اخدت حته من السما و عملتها كوره ممكن تبقى ازاى من جوه؟
اكيد ناعمه، و اكيد حلوه، و اكيد و انت بتقطم منها مش هتسيب تعاريج.صح ..بالظبط ذى خوخه مدوره و ناعمه و حلوه و من غير تعاريج.
ممكن تكون ما دقتش السما ،لكن دقت الرمان؟ طب عمرك دقت حاجه خليتك تتمنى ان كل الناس تدوقها؟ حاجه تسيب بين شفايفك طعم يخلى مهما الجوع يقرصك ما ترضاش تلخبط طعمها بطعم اى حاجه تانيه؟
يا جماعه هى دى رمانه او بمعنى اصح فرط الرمان .
كنت دايما لما بشوف فرط الرمان باحس انه خساره فى الاكل. اصله بجد اجمل من انه يتاكل و خلاص و كنت باحس انه اقرب للجواهر منه للفاكهه.الله مثلا على عقد فرط الرمان!! لكن لما كنت باحاول اعمل منه عقد كان بيبقى اضعف من انه يستحمل ثوانى و يرجع تانى فرط رمان.
*فى الشتا قدام البحر و انت بتتنفس هوا اسكندريه الساقع ،لابس 50 حاجه فوق بعض و مفيش غير وشك و كفوفك بس هما اللى بيستقبلوا الهوا.تحس فجأه ان كل احساس فيك ممكن تعبر عنه نسمة هوا بارد تلمس وشك او كفوفك.
اهو انا بقه كل ما ادوق الرمان احس بكده! احس ان حبات فرط الرمان يقدروا يعبروا عن كل احساس فيا .
احس بالحريه من تدافعهم وقت الخروج من الثمره ،و بالجمال من روعة درجات الوان الحبه القرمزى الشفاف ،و بالرقه من دوبان الحبات فى حضن شفايفى ،و بالشقاوه من ضحكات رذاذ عصيرهم جوايا و برغم ده كله لو شفتهم و هما جوا الثمره تحس انهم بيندهولك بروح شاربه من الشقا و كأن الشجره متشاله على كتافهم مش هما اللى متشعلقين فيها.
فرط الرمان بقى من غير ما تعرف اسمها تحتار تقول عليها ايه: ريشه حمامه وقعت من جناح مكسور و دواها الهوا ،ولا كام نقطة ملونه وقعوا من ريشة طفل صغير فوق باليته و لما اتجمعوا عملوا لوحه جميله و محندقه
يمكن كمان تقول عليها اوضه و ليها الف باب منهم بابين متغطيين بقماشه سوده و مسنكرين باقفال نحاس و ان شفتهم يمكن تخاف او تفتكرانهم بينادوك علشان تشيل لون الزمان ولو قربت منهم هتلاقى نفخه واحده منك تبين جنه اجمل شجره فيها شجرة الرمان
ممكن كمان توصفها بانها ممكن تلخص الحياه كل الحياه فى اٌهه دايبه و دمعتين و ساعات تقولها بشعره طايره و ضحكه بتخلى الهوا حتى الهوا يدوب حنين
عارف ازاى ممكن تكون مبهور لو انك بتشوف لأول مره ثمرة رمان و لقيت قشرتها بتتفتح و كل حبه بتخلع شالها و تنزل عشان تستقبلك.
تخيل بقه لو قلبك هو اللى كان تحت القشره و خلع شاله و حب يستقبل الحياه.اهى دى بالظبط فرط الرمان:قلبى و قلب خوخه و كل اللى فى الطبق خالعين شيلانهم و بكل ذره فى كيانهم بيستقبلوا الحياه.بالرغم من انهم شايفين سكاكين الحياه و ياما داقوا طعمها و يمكن كمان من مرها افتكروا طعم الحلو راح الا انهم لسه بيعاندوا الحياه.
وكأنهم مقررين يا يدوبوا يا تدوب الحياه.
ناقص حاجه...
فرط الرمان بقه اصعب ما فيها انها سهل اوى تجرى من بين صوابعى و تهرب و تستخبى
هاعمل ايه؟ ما هى لازم تفضل فرط الرمان...
مازلنا فى الطبق
La brize
Monday, January 16, 2006
فاصل.. و نعود للفاكهة
إنسان جديد
كان في زمان انسان حزين
بقيود كتير مشدود سجين
بيقول يا مين ينجدني مين
شاف الطريق قدامه شوك
و خوف و موت.. سنين انين
لكن و رغم الضلمة ده
فضل الامل يلعب بقلبه سنين طوال
يرسمله باب، شبابيك و نور
و قلوب ترفرف ليل نهار
و في يوم حلم
و في حلمه كان بطل همام في طريق طويل
و عليه يفوت بين شوك و خوف
و في ايده شابك جيل بجيل جديد جميل
و كأنه آل محتار ما بين
كل الحياه علشان يكون قلب الحياه
بعد ما يرسم في قلوب كتير جنة بصحيح
صنع الاله
وقف للحظة
و النور كتير
بيلم بعضه يجري عليه
يكسر حواجز و ينط يجي ميت الف باب
و وحدة وحدة الشوك يدوب
و الفرحة تكتر تملى القلوب
و النور يبان
و كأنه جان و في ايده مصباح الامان
و عنها.... داب
بدموعه قال
ساعد يا رب
اكرم و ارضى
قوي الشباب
ارعى عقول.. كل اللي فبها منك يا رب
ارعى قلوب كل اللي ليها حبك يا رب
نور دروب اجمل ما بيها رضاك يا رب
فتح عينيه
صوت الادان
ما الفجر كان بيقول آمين
Saturday, November 26, 2005
انت حر
*فى الشارع : من حقك ان تقول ما تحب و من حق أمن الدوله ان يعاقبك على ذلك
*فى البيت:من حقك ان تقتل اخوتك طالما ان الجيران لا تشعر بك و من حق والدتك ان تقتلك ان اسمعت بكم الجيران
*فى الجامعه:من حقك الا تحضر المحاضرات و تنجح اخر العام بامتياز و من حق كل من يحضر المحاضرات ان يرسب اما نتيجه لاصابته بالتخلف العقلى او الملل العضال او لاخطاء اقترفها الدكتور نفسه
*بين الاصدقاء: من حقك ان ترتدى ما تشائين
و من حق اعز صديقاتك ان ترمقك من اخمص اصابعك الى ام رأسك
*فى المستشفى:من حقك ان تشرح للطبيب شكواك اما بالصياح او بالبكاء او بالصمت الرهيب
و من حق الطبيب ان يسد اذنه او يتركك ليأتى بالمناديل او ان يرقص على انغام موبايله حين تطلبه المدام
*فى المدرسه:من حقك الموجه ان يمنع استخدام العصى فى المدارس
ومن حق المدرس ان يستخدمها فى غياب الموجه
ومن حق الطالب ان يضحك كلما ضرب ضامرا كلمة (قديمه!!)
*فى المصالح الحكوميه:من حق موظف الحكومه ان يتناول افطاره و يحتسى كوب الشاى
ومن حقك ان تضع نفسك فى مشاكل لا حصر لها ان حاولت ان تعترض سنفونية مصه للشاى بطلباتك المزعجه
*مع نفسك:من حق نفسك ان تتمنى ان تصل لحبيبها
ومن حقك ان تقطع كل صلة لك به طالما ان المواصلات صعبه
و برغم كل ذلك ........
مازال...كل واحد حر......
*فى الشارع : من حقك ان تقول ما تحب و من حق أمن الدوله ان يعاقبك على ذلك
*فى البيت:من حقك ان تقتل اخوتك طالما ان الجيران لا تشعر بك و من حق والدتك ان تقتلك ان اسمعت بكم الجيران
*فى الجامعه:من حقك الا تحضر المحاضرات و تنجح اخر العام بامتياز و من حق كل من يحضر المحاضرات ان يرسب اما نتيجه لاصابته بالتخلف العقلى او الملل العضال او لاخطاء اقترفها الدكتور نفسه
*بين الاصدقاء: من حقك ان ترتدى ما تشائين
و من حق اعز صديقاتك ان ترمقك من اخمص اصابعك الى ام رأسك
*فى المستشفى:من حقك ان تشرح للطبيب شكواك اما بالصياح او بالبكاء او بالصمت الرهيب
و من حق الطبيب ان يسد اذنه او يتركك ليأتى بالمناديل او ان يرقص على انغام موبايله حين تطلبه المدام
*فى المدرسه:من حقك الموجه ان يمنع استخدام العصى فى المدارس
ومن حق المدرس ان يستخدمها فى غياب الموجه
ومن حق الطالب ان يضحك كلما ضرب ضامرا كلمة (قديمه!!)
*فى المصالح الحكوميه:من حق موظف الحكومه ان يتناول افطاره و يحتسى كوب الشاى
ومن حقك ان تضع نفسك فى مشاكل لا حصر لها ان حاولت ان تعترض سنفونية مصه للشاى بطلباتك المزعجه
*مع نفسك:من حق نفسك ان تتمنى ان تصل لحبيبها
ومن حقك ان تقطع كل صلة لك به طالما ان المواصلات صعبه
و برغم كل ذلك ........
مازال...كل واحد حر......
فى رنته..
la brize
Saturday, November 12, 2005
تحت عباية رمضان
اقوى من كل الشياطين..
**قال:يا اخى من بعد العيد ما خلص وانا مش عارف اصلى ولا ركعه قيام.ده الشياطين دول جامدين بشكل.
رد عليه:و اشمعنى يعنى كنت بتصلى فى العيد؟
قال: لأ نبيه! طبعا عشان الشياطين كانت محبوسه.
استغرب و رد عليه:بس ده كان فى رمضان بس!!!!!
تـنسعدى..
** اكثر رواد المسجد من السيدات هم جداتنا المسنات وبعدهم تأتى الشبات من الأنسات و حديثى الزواج ،لذا ان كنت بين صفوفنا لتجد حتما احدى السيدات المسنات تسلم عليك بعد انتهاء الصلاه قائله "حرما" او "تقبل الله" و غالبا ما تبادر السيده بعدها بالسؤال:"متجوزه؟"
"لأ"
"الهى تنسعدى يا رب" و تقصد الزواج طبعا.
و هنا يدور فى ذهنى سؤال:هو فعلا الجواز سعد؟ للست بس ولا للراجل كمان؟ يا ترى هى نفسها انسعدت بالجواز؟ ولا قصدها ربنا يجعل جوازى انا مسعود؟ ولا يمكن تكون دعوه قديمه موروثه من ايام ما كان الجواز سعد؟
.....فى الاخر وصلت الى أن السعد اللى هى تقصده اكيد اكيد الجنه مش احنا فى مسجد برضه!!؟
و الله ما انا سيباك!..
**ازاى يعنى تمشى كده مره واحده؟
و تمشى امتى بعد ما اتعودنا عليك و اتعودت علينا ؟
طب خليك شويه..او حتى خليك على طول يا سيدى هو انت قاعد على قلوبنا.
ده انا اول مره اعرف لون الربيع و اول مره اشم ريحة الياسمين وانا ساجده واول مره ارقص رقصة الفراشه من غير مأقع
و كمان اول مره افهم كلام جدتى و كلام بنت اختى فى نفس الوقت.اول مره اتكلم بلغه يفهمها بابا و ماما و كل صحابى سوى.
خلاص لقيت الحبيب و داب القلب .خلاص قضيت على السحابه السوده و اتعلمت اغوص فى الفضا من غير ماخد دروس لياقه.
ابدا مش سيباك تمشى !!
هاخبى التروايح و الصوم و القران فى حته فى قلبى مش هتعرف توصلها ابدا عشان ما تخدهمش و تمشى ..
والله والله ما انا سيباك!!
LA BRIZE
اقوى من كل الشياطين..
**قال:يا اخى من بعد العيد ما خلص وانا مش عارف اصلى ولا ركعه قيام.ده الشياطين دول جامدين بشكل.
رد عليه:و اشمعنى يعنى كنت بتصلى فى العيد؟
قال: لأ نبيه! طبعا عشان الشياطين كانت محبوسه.
استغرب و رد عليه:بس ده كان فى رمضان بس!!!!!
تـنسعدى..
** اكثر رواد المسجد من السيدات هم جداتنا المسنات وبعدهم تأتى الشبات من الأنسات و حديثى الزواج ،لذا ان كنت بين صفوفنا لتجد حتما احدى السيدات المسنات تسلم عليك بعد انتهاء الصلاه قائله "حرما" او "تقبل الله" و غالبا ما تبادر السيده بعدها بالسؤال:"متجوزه؟"
"لأ"
"الهى تنسعدى يا رب" و تقصد الزواج طبعا.
و هنا يدور فى ذهنى سؤال:هو فعلا الجواز سعد؟ للست بس ولا للراجل كمان؟ يا ترى هى نفسها انسعدت بالجواز؟ ولا قصدها ربنا يجعل جوازى انا مسعود؟ ولا يمكن تكون دعوه قديمه موروثه من ايام ما كان الجواز سعد؟
.....فى الاخر وصلت الى أن السعد اللى هى تقصده اكيد اكيد الجنه مش احنا فى مسجد برضه!!؟
و الله ما انا سيباك!..
**ازاى يعنى تمشى كده مره واحده؟
و تمشى امتى بعد ما اتعودنا عليك و اتعودت علينا ؟
طب خليك شويه..او حتى خليك على طول يا سيدى هو انت قاعد على قلوبنا.
ده انا اول مره اعرف لون الربيع و اول مره اشم ريحة الياسمين وانا ساجده واول مره ارقص رقصة الفراشه من غير مأقع
و كمان اول مره افهم كلام جدتى و كلام بنت اختى فى نفس الوقت.اول مره اتكلم بلغه يفهمها بابا و ماما و كل صحابى سوى.
خلاص لقيت الحبيب و داب القلب .خلاص قضيت على السحابه السوده و اتعلمت اغوص فى الفضا من غير ماخد دروس لياقه.
ابدا مش سيباك تمشى !!
هاخبى التروايح و الصوم و القران فى حته فى قلبى مش هتعرف توصلها ابدا عشان ما تخدهمش و تمشى ..
والله والله ما انا سيباك!!
LA BRIZE
Wednesday, November 09, 2005
باب موارب
ناشفه و غامقه..كلها شويه و مش هتلاقيها،لكن لسه مضايقه عنيك و بتضايق صوابعك لما تيجى تلمسها.
جرح قديم سايب قشره؟ لأ! مش بالظبط.
هى فى الحقيقه قشرة تفاحه معطبه بقالها مده.كل ماجى ارميها تحصل حاجه فأنساها و افضل كل ما أعدى الاقيها.
مش فاكره بالظبط امتى اشترتها و لا ان كنت اكلتها ولا رمتها لكن كل ما أشوف قشرتها تفكرنى ان فيه تفاح معطب.باين عليها قاعده عشان كده و مش هتخلص الا لما تثبت فكرتها فى دماغى و ساعتها هرميها فى ركن بعيد فى دماغى و هحط معاها ورق القصايد الاصفر و كارنيه المكتبه الدايب و الصور القديمه.و بس؟لأ!!هأقفل عليهم باب ولا.......احسن اسيبه موارب؟
LA BRIZE
ناشفه و غامقه..كلها شويه و مش هتلاقيها،لكن لسه مضايقه عنيك و بتضايق صوابعك لما تيجى تلمسها.
جرح قديم سايب قشره؟ لأ! مش بالظبط.
هى فى الحقيقه قشرة تفاحه معطبه بقالها مده.كل ماجى ارميها تحصل حاجه فأنساها و افضل كل ما أعدى الاقيها.
مش فاكره بالظبط امتى اشترتها و لا ان كنت اكلتها ولا رمتها لكن كل ما أشوف قشرتها تفكرنى ان فيه تفاح معطب.باين عليها قاعده عشان كده و مش هتخلص الا لما تثبت فكرتها فى دماغى و ساعتها هرميها فى ركن بعيد فى دماغى و هحط معاها ورق القصايد الاصفر و كارنيه المكتبه الدايب و الصور القديمه.و بس؟لأ!!هأقفل عليهم باب ولا.......احسن اسيبه موارب؟
LA BRIZE
Sunday, October 30, 2005
ااااااااميييييييين
يااه!قد ايه جميله كلمة "اااااااامييييييييين"وكل الناس فى المساجد بتقولها فى نفس الوقت، كل يوم فى كل ركعه بعد سورة الفاتحه.
تخيل كده كل المسلمين فى الارض بيدعوا كل يوم بنفس الدعاء(سورة الفاتحه)كل يوم و بكل قوه و فى نفس واحد يقولوا "ااااااااامين".
ياااه!ده لو حد حكالى قصه و قال "و كلنا و قفنا ندعى ان الارض تتزلزل تحت رجليهم و كلنا قلنا "اااامين" فى نفس واحد،هأجرى استخبى للارض تتهز بيا.
احساس رهيب و انت بترفع صوتك وايا الناس كلهم وانت بتقول "ااامييين".ذى ما تكونوا كلكم بتحفروا بير خير و تضرب ضربتك معاهم فى نفس الوقت.ضربتك تفرق و دوبان ضربتك فيهم بيخلى ودانك تحب صوت الضرب و ما ترتحش الا لو سمعتها منه شويه كل يوم.
ايه احساس جزيئات السكر و هى دايبه فى الميه؟مش عارفه ليه حسيت انى اعرفه وانا بقول "اااااااميييين"
LA BRIZE
يااه!قد ايه جميله كلمة "اااااااامييييييييين"وكل الناس فى المساجد بتقولها فى نفس الوقت، كل يوم فى كل ركعه بعد سورة الفاتحه.
تخيل كده كل المسلمين فى الارض بيدعوا كل يوم بنفس الدعاء(سورة الفاتحه)كل يوم و بكل قوه و فى نفس واحد يقولوا "ااااااااامين".
ياااه!ده لو حد حكالى قصه و قال "و كلنا و قفنا ندعى ان الارض تتزلزل تحت رجليهم و كلنا قلنا "اااامين" فى نفس واحد،هأجرى استخبى للارض تتهز بيا.
احساس رهيب و انت بترفع صوتك وايا الناس كلهم وانت بتقول "ااامييين".ذى ما تكونوا كلكم بتحفروا بير خير و تضرب ضربتك معاهم فى نفس الوقت.ضربتك تفرق و دوبان ضربتك فيهم بيخلى ودانك تحب صوت الضرب و ما ترتحش الا لو سمعتها منه شويه كل يوم.
ايه احساس جزيئات السكر و هى دايبه فى الميه؟مش عارفه ليه حسيت انى اعرفه وانا بقول "اااااااميييين"
LA BRIZE
اخضر و بأستيك من فوق
"خناقه"
ده شكل الحوار الثقافى اللى بنشوفه على شاشات التليفزيون و فى اى حته قرر فيها شوية ناس يقعدوا يتكلموا فى اى موضوع حتى لو كان "الأوته النهارده بكام؟"
هتلاقى اللى يقولك ان الأوته مجنونه و مش معنى انها امبارح كانت ب2 جنيه تبقى النهارده ب 2 جنيه برضه.ده ممكن تكون وصلت 5 جنيه النهارده.
و اللى يقولك مجنونه ايه؟ده الطب عندنا دلوقتى كده!!ده أمريكا بتخطط علشان تسرق الدكاتره بتوعنا.اُماااال؟
واحد تالت يقولك ان السعر اللى بتدوروا عليه ده 2000 جنيه.
ازاى يعنى؟ما هو فهم انكم تقصدوا فستان هيفا الأحمر بس يعنى.. مكسوفين تقولوا و هو واد فتك و يفهمها و هى طايره..
كان فيه اتنين قاعدين هناك .واحد مصمم ان الطماطم بتتزرع فى اسكندريه و التانى راسه و الف سيف ان كل الطماطم جايه من بنى سويف
الاولانى متأكد انها من اسكندريه و عشان كده مجنونه ذى جو اسكندريه بالظبط تلاقيه يحب يهزر معاك دايما يعنى كنوع من التغيير
و التانى شايف ان بنى سويف قلقانه.بيقولوا موضوع الحريق ده السبب.حتى الأوته اتجننت من بعد ما شافت الحادثه
باااس!! كفايه.هو مين اللى عمل ايه؟
ايه اللى احنا بنقوله ده و كنا عايزين ايه؟
سرحان عبد البصير(عادل امام فى مسرحية شاهد ما شافش حاجه) لما الظابط سأله :"الراجل اللى قتل الرقاصه كان لابس ايه؟"
قاله:"شراب.."
قاله:"و كان شكله ايه؟"
رد عليه:"اخضر و بأستك من فوق "
مش بذمتك كان أقرب للموضوع من مثقفى الخناقات؟
LA BRIZE
"خناقه"
ده شكل الحوار الثقافى اللى بنشوفه على شاشات التليفزيون و فى اى حته قرر فيها شوية ناس يقعدوا يتكلموا فى اى موضوع حتى لو كان "الأوته النهارده بكام؟"
هتلاقى اللى يقولك ان الأوته مجنونه و مش معنى انها امبارح كانت ب2 جنيه تبقى النهارده ب 2 جنيه برضه.ده ممكن تكون وصلت 5 جنيه النهارده.
و اللى يقولك مجنونه ايه؟ده الطب عندنا دلوقتى كده!!ده أمريكا بتخطط علشان تسرق الدكاتره بتوعنا.اُماااال؟
واحد تالت يقولك ان السعر اللى بتدوروا عليه ده 2000 جنيه.
ازاى يعنى؟ما هو فهم انكم تقصدوا فستان هيفا الأحمر بس يعنى.. مكسوفين تقولوا و هو واد فتك و يفهمها و هى طايره..
كان فيه اتنين قاعدين هناك .واحد مصمم ان الطماطم بتتزرع فى اسكندريه و التانى راسه و الف سيف ان كل الطماطم جايه من بنى سويف
الاولانى متأكد انها من اسكندريه و عشان كده مجنونه ذى جو اسكندريه بالظبط تلاقيه يحب يهزر معاك دايما يعنى كنوع من التغيير
و التانى شايف ان بنى سويف قلقانه.بيقولوا موضوع الحريق ده السبب.حتى الأوته اتجننت من بعد ما شافت الحادثه
باااس!! كفايه.هو مين اللى عمل ايه؟
ايه اللى احنا بنقوله ده و كنا عايزين ايه؟
سرحان عبد البصير(عادل امام فى مسرحية شاهد ما شافش حاجه) لما الظابط سأله :"الراجل اللى قتل الرقاصه كان لابس ايه؟"
قاله:"شراب.."
قاله:"و كان شكله ايه؟"
رد عليه:"اخضر و بأستك من فوق "
مش بذمتك كان أقرب للموضوع من مثقفى الخناقات؟
LA BRIZE
