Sunday, September 25, 2005

 
لما الدنيا تنور فجأه
باعرف انه شايللى مفاجأه
ورده،فراشه،حته سكر
و افضل قاعده انا فيها بافكر
واما يجينى يطل عليا
يلعب قلبه بقلبى شويه
ليه هتخبى
طب مانا عارفه
و ابدأ ادور
يمكن جوه الشنطه البمبى
المحطوطه فى قلبه الابيض
او فى بوكيه الورد اياه
اللى شفايفه تكون شيلاه
وقت الضحكه
برضه مخبى؟
طب راح اقولك حاجه كمان
انت جايبلى فيها لبان
احمر و اخضر
و ازرق نيلى
احمر لاجل شفايفى الخايفه وقت الشده
و اخضر لون الشجره الطارحه على باب بيتنا
اما النيلى حكايته حكايه
اصله معايا من ايام ما عرفت اغنى للصبحيه
لسه مخبى؟
مش هتقوللى طب ايه هيه؟
بص فى قلبى شويه و قال لى
هيه حمامه لطيفه شقيه
جبتها من اسبوع و شويه
لكن لما لقيتك جايه
خفت عليكى
لاحسن لاجلها تبكى عنيكى
او بوجودها تشعلق قلبك
يمكن غيرت انا منها عليكى
طارت
لكن قبل ما تمشى
و عدت انها تبقى تزورك
لما اغيب عنك تلاقيها
جايه تمسى
يمكن بيها افكر قلبك
و اضمن ان الشنطه البمبى
والورد المتشال اياه
يفضلوا جنبى
La brize

Comments:
nice blog.. but we would like to know more about u..
keep posting
 
ايه كل الأحاسيس والكلام الجميل ده
 
يا خرابي ...ايه الطعامة دي كلها ...اكثر من رائعة
 
لما الدنيا تضلم جدا
بأمسك قلمي
و أقعد أشخبط
بأرسم كلمة
كلمة و كلمة حروف تتربط
أيوة ساعات الكلمة تخونني
طيف الفكرة بيهرب مني
جايز أتلخبط
لكن دايما
مهما الدنيا تضلم جدا
مبغمضش و أقول أنا خايف
بأفضل شايف
حلمي و أملي
لازم قلمي يموت ألمي
أصل أنا عارف
إن الحبر نقط من دمعي
نقطة بنور القمر الكاشف
تنزل تروي الورق الناشف
لأ
أنا آسف
تنزل تروي خدودي الأول
قبل ما تنزل
تروي الورقة


© Ahmad Eddeeb
 
Post a Comment

<< Home

This page is powered by Blogger. Isn't yours?