Sunday, September 25, 2005

 
يوم مع بابا
بابا:شوف يا ابنى انت عارف ان مافيش حد بيحبك فى الدنيا دى قد أبوك و امك مثلا والدتك ممكن تكون بتحبنى بس مش ذى ما ابويا و امى بيحبونى.
سعدون:انا بس..
بابا:اه !! ابدأ بقه فلسفه كدابه و سفسطه فارغه.الكلام اللى انت بتفكر فيه يابنى ده كلام غريب جدا و غير طبيعى
سعدون:ما هو أصل..
بابا:عارف.هتقول ان البشر مختلفين. مش بقولك سفسطه فارغه و كلام فى خيالك انت بس.ما ينفعش نطبقه على أرض الواقع
سعدون:انا بس باحاول..
بابا:غيرك كتير حاول و غيره حاول.خليك واقعى يابنى.اعرف ايه اهدافك.يلا قول...ايه أهدافك؟
سعدون ينظر الى والده مترددا
بابا:أكيد يعنى اهدافك انك تتخرج من الكليه و تنجح بأحسن تقدير ممكن و تلاقى وظيفه كويسه الصبح و تكمل بواحده بعد الظهر لحد ما تعرف الدنيا فيها ايه و الناس اشكالها ايه.أصلك دلوقتى مش عارف حاجه ولا شايف حاجه.
سعدون:بس المفروض ..
بابا:المفروض انك تسمع كل كلامى لأن كلامى هو الصح علشان انا اعرف اكثر منك و انا ابوك اللى بيحبك.صح ولا انا غلطان ولا ده اى كلام ولا احنا ما كناش شباب ولا ايه.
سعدون ينظر الى والده ولا يعرف كيف يجيب
بابا:ايوه !هو ده عيبك.انك مش صريح و على طول ساكت.لئيم..اتكلم يا سيدى .فضفض.هتقول لمين لو ماقلتش لأبوك و امك؟ علشان كده بتقع و تتكعبل و عشان كده عمرك ماهتنجح فى حياتك.
سعدون:حاضر
بابا:لكن اوعاك تقوللى الكره و النادى و الكلام الفارغ تانى مره.انا عدتها بمزاجى المره اللى فاتت.اوعى....سامع!!
سعدون:حاضر
بابا:خلاص هتخليك صريح و تفضفض بكل حاجه؟هو انا يابنى هاكلك؟يعنى هاعملك ايه ولا هى حجج فارغه علشان ماتتكلمش معايا.انا بس باعمل اللى عليا علشان قدام ربنا ابقى مخلص ضميرى.عايز ايه تانى بس؟كل حاجه اديتهالك ما قصرتش فى اى حاجه.لكن انا ندمان على كل الحب اللى اديتهولك و فى الاخر ده يبقى جزائى.اخص عليك.غور من قدامى .يلا مش عايز اشوف وشك تانى.
سعدون يخرج من الغرفه مدندننا :و النبى نولونى الولاعه....عايز اولع روما بحالها.
LA BRIZE

Comments:
و اخفض...
لهما...
 
Post a Comment

<< Home

This page is powered by Blogger. Isn't yours?