Friday, September 16, 2005

 
كلام عيال
ريحة الحضانه
عارفين ريحة المكرونه لما بتتسلق و جنبها الصلصه بتتعمل بيبقوا مع بعض ليهم ريحه غريبة كده بس مميزه أوى زى ماتقول مثلا "ريحة الصيدلية" كلنا عارفينها.اهى الريحه ديه بسميها ريحه الحضانه علشان وانا فى الحضانه كانوا بيعملولنا وجبه و كانت غالبا مكرونة بالصلصة و بتبقى الريحة ده قالبه الدنيا و قالبه معدتى كمان.
مكرونه بالصلصه يعنى هأقلب الطبق أو هأخد مكرونايه و أفضل أكل فيها طول الوقت و بالرغم من ان عقوبة قلب الطبق هى الحرمان من الأكل و ده الهدف نفسه الا ان موقف العقوبة كان بيخلينى افضل القعدة مع العيال و أعمل نفسى باكل و خلاص و ريحة الحضانه تفضل محاوطانى من كل ناحيه.
بعد سنين كتير أوى كنت ساعات الاقى ريحة الحضانه هفه عليا وانا طالعه السلم او ماشيه فى الشارع او حتى و انا قاعدة فى بيتنا و ساعتها كانت برضه معدتى تتقلب ذى ما أكون لسه مفروض عليا أدخل أوضة الأكل و أقعد جنب العيال و اعمل نفسى باكل.كأنى كبرت ده كله و لسه جوايا خوف مرتبط بريحة الحضانه و مش عايز يروح.يا ترى كام حاجة فى حياتنا ذى ريحه الحضانه؟ و كام تصرف من تصرفاتنا كان بسبب ريحة الحضانه و اخواتها؟
يا ترى يا ريحة الحضانه ممكن كمان أورثك لأولادى؟؟
La brize

Comments:
عارفها ريحه الحضانه اللى هى طبعا ريحه أكلها
بس أنا غيرك لما باشمها باشتاق لأكلها ، يمكن بأشتاق للطفوله فى صورة أكلها
بس ماكانتش مكرونه بالصلصه عموما
 
و كم من القرارات الخاطئة التي اتخذناها بسبب الخوف المفروض علينا من ماضينا، و كم من الفرص ضيعناها لكي ننطلق و نكون انفسنا و نختار ما نريد و نحيا كما نرغب و نبدع ما نحبه، بسبب الخوف المترسب من احداث وقعت في طفولتنا الغير واعية أحيانا، و كم من القصص لم تكتمل بسبب روائح كريهةالذكريات سدت انوفنا عن التمتع بروائح ورد المستقبل
 
طبعا عارفها
زي ريحة إذاعة الشرق الأوسط الساعة 7 الصبح بالضبط
 
Post a Comment

<< Home

This page is powered by Blogger. Isn't yours?