Sunday, August 28, 2005

 
كلام عيال
الشارع الحلو
هو فى الحقيقه زقاق صغير بيربط بين شارعين.حلو ليه بقه؟علشان نظيف اوى ما فيهوش ورق ولا طوب ولا حتى تراب.هوعبارة عن و معظم البيوت فيها قفص عصافير صغير او قصيص ورد فى البلكونات .
اهل الشارع ده ناس غريبة اوى علشان بيغسلوا الشارع بتاعهم تقريبا كل اسبوع .الستات تكب الميه من البلكونات و الرجاله تنظف الشارع.فى رمضان و الاعياد الشارع بيبقى رائع مليان زينه و فوانيس و انوار.
باختصار تحس ان الشارع ده قطعه من عالم غريب غير العالم اللى منه الشوارع التانيه خالص.لا فيه دوشه و لا زحمه و لا عربيات كتير و على طول ضل و هوى.
واحنا صغيرين كنا بنحب بمشى من الشارع الحلو واحنا رايحين المدرسة الصبح علشان هادى و احنا بنبقى لسه نايمين مش حمل الزعيق و الزحمه و كلاكسات العربيات و دخانها و احنا مروحين كنا بنعمل لماما باى باى من البلكونة اللى بتطل عليه.
لما كبرنا بقينا بنحب الشارع الحلو علشان بيبعدنا عن الناس و الدوشه و بيسمحلنا نتنفس اصل الدوشه اللى جوانا مع الدوشه اللى برة بتكتم النفس و تنرفز و تخلى القلب يموت. يمكن كمان علشان بيفكرنا بشارع قديم جوانا لساه نظيف و جميل و على طول ضل و هوى يمكن نكون نسيناه او بنستطول مشوارة ، لكن ساعات بنحتاج ولو حتى نشوفه من البلكونه اللى بتطل عليه ونطمن انه موجود و لساه نظيف و ضل و هوى.
بيوت صغيرة جنب بعض قدام كل واحد منهم شجرة
la brize

This page is powered by Blogger. Isn't yours?